真假有錢人

錢是自己辛勤工作賺來，我對800蚊都相當著緊，更何況是800萬元！

讀到新聞指，有買家斥資1.6億元買入中海外（688）旗下啟德1號7座全幢4伙，轉頭覺得同屋苑另一幢物業更好，寧願撻定820萬元，再斥2億元換貨。咁啱，兩次交易的呎價均刷新紀錄。

就當我未見過大蛇小便，真係百思不得其解。

地產代理解釋，該買家購入7座時，發展商未推其他低座物業，後來發展商推1座，該買家寧願輸820萬元都要換較靚的，還補一句「人哋係生意人，精明過你」。

心內隨即充滿疑竇，既然對方是精明生意人，何解未睇清楚想通透就斥資1.6億元買7座；做得精明生意人，應該很有耐性，不會衝動行事，理應了解整個樓盤的布局、座向，才有目標地出擊；做得精明生意人，應該就算一蚊都唔想輸畀人，莫講轉眼白輸820萬；做得精明生意人，也可以兩座皆買入也不會精明到難以理解。精明嘅嘢，我真係識條鐵咩！

地產代理指「有錢人的思想係好得意」，這點我又同意喎。聽聞九龍站豪宅，個別單位長期丟空，有朋友探人時，在電梯走廊聞到陣陣焗促難聞氣味，估計是單位長期丟空，單位內喉管長期無人使用所產生的氣味。又有口痕友報料說，九龍站樓盤的停車場內，有私家車長期封塵。

有錢人買了豪宅車位，然後去了哪兒呢？認真得意囉。